الأربعاء، 2 مايو 2012

welcome to facebook

و في يوم كده فتحت الفيسبوك..قلت لما اشوف ايه الاخبار يعني..
لقيت مفيش أخبار..مفيش حد ..مفيش داعي
لكن اكتشفت ان انا عندي كمية friends رهيبه لدرجة اني نسيت اساميهم..
قلت لما اشوف هما مين!!
ناس كانو معايا سنه واحده و سافروا..
ناس كنا مجبرين نكون مع بعض في حاجه..
ناس بقوا بيشوفوني و مش بيسلموا..
الخلاصه ان كلهم مش "أصدقاء" خاااالص..
عادي عادي..ما أنا كمان ممكن اعمل حاجه حلوه 
هعملكوا "unfriend "و خلاص و اريح دماغي :) 
و مش هسيب غير اللي انا بحبهم فعلا حتى لو مش بنتكلم..
المهم..لقيت اسم واحد معرفتش امسحه..
ازاي امسحه و هو الاسم اللي على حسابي الشخصي..
انا مش عايزه اكون صاحبتي..
ده حتى لما اجي اتشات معايا مش بلاقي كلام يتقال..
و نقعد نقضيها نكت بايخه..انا بكتب"هههههههه" و انا في الحقيقه مش بضحك..
و اكيد انا برضه بتعمل كده..
طيب و بعدين..قعدنا نفكر مع بعض ايه الحل؟؟
فوصلنا لحل كويس..اننا نسيب بعض و نبعد اوي..
و نبقى نسأل على بعض كل فين و فين ده احنا برضه عشره حاجه و عشرين سنه..
انا وافقت متردده لكن انا مصدقت تقريبا ووافقت فورا..
سلمت عليا مره اخيره قبل ممشي و قلتلي اخد بالي من نفسي..
و قطعنا ساعتها كل حاجه تربطنا ببعض..
لكن فضلنا شركاء..
في حسابنا على الفيسبوك :)